Shqiponjat ‘pushtojnë’ rrjetet sociale, festë për golat e Xhakës dhe Shaqirit
Fitorja e Zvicrës kundrejt Serbisë, falë golave të shënuar nga futbollistët me origjinë shqiptare, Granit Xhaka i cili shënoi golin e barazimit dhe golit special të Xherdan Shaqiri në minutën e 52- ka ekzaltuar mijëra tifozë. Të veçanta dhe surprizuese ishin gjestet e dy futbollistëve, të cilët pas golave bënë shqiponjën me duar në mes të fushës.
Edhe pse Shqipëria nuk është pjesë e këtij kampionati botëror, padyshim që Xhaka dhe Shaqiri si dhe lojtarët e tjerë të skuadrës zvicerane që janë me origjinë shqiptare kanë arritur të përcjellin të njëjtat emocione sikur të luante kombëtarja jonë. Fotot dhe videot e Graniti dhe Shaqirit me shqiponjë në duar ndërsa festojnë për fitoren kanë pushtuar facebook-un. Personazhë të njohur publikë dhe çdo qytetar i thjeshtë shqiptar ka festuar dhe reaguar për emocionet e bukura që na dhuruan në këtë ndeshje me Serbinë.
Në fotot e postuara shihen Xhaka dhe Shaqiri pas shënimit të golave, të dy me simbolin e shqiponjës. Shumica e personazhëve të njohur i kanë shoqëruar fotot me flamurin e Kosovës dhe Shqipërisë, bashkë me simbole që tregojnë shqiponjën dy-krenare. Më poshtë sjellim disa nga mesazhet entziaste që shprehin gëzim dhe krenari.
© 2018, Pozitivi. All rights reserved.
