Shqiptarët, këta konsumues masivë të bukës!

Shqipëria renditet në një nga vendet me konsumin më të lartë të bukës në Evropë. Ky produkt ishte edhe në top listën e produkteve për të cilat u shpenzua më shumë në vitin 2020. Sipas të dhënave nga Eurostat (grafiku më lartë) konsumi i saj ishte 4.8%, më i larti në Evropë. Por duket se ky realitet po ndryshon. Nisja e luftës në Ukrainë dhe pasojat që ajo shkaktoi sollën një rritje të vazhdueshme të çmimit të bukës në vendin tonë. Fillimisht rritja ishte evazive në disa nga furrat e kryeqytetit në masën e 10 lekë të rinj. Më pas rritja e çmimit vijoi në 20 lekë dhe u zgjerua gjeografikisht në të gjitha qytetet e vendit. Pozitivi.org bisedoi me një nga sipërmarrëset që ka një furrë buke në Tiranë. Ajo pohon se çmimi i lëndëve të para është rritur deri 3 herë gjatë këtyre 3 muajve të fundit.

Rritja e çmimit, uli sasinë e blerjeve të bukës

Kjo rritje çmimi është shoqëruar me një rënie të konsumit nga ana e klientëve. Erida Bonjaku drejtuesja e furrës së bukës, i tha pozitivi.org se konsumatorët nuk kanë mundësi financiare të blejnë bukë si më parë.

Rritje të çmimit nuk ka pësuar vetëm buka, por edhe produktet e pastiçerisë. Madje aty është më e ndjeshme, me 50 lekë të rinj.

Rritja e çmimit të energjisë elektrike, a do iu vijë radha edhe bizneseve?

Duke nisur nga data 1 Tetor, familjarët që kalojnë fashën prej 800 kë do e paguajnë më shtrenjtë energjinë elektrike. Ministrja e Infrastrukturës dhe Energjisë Belinda Balluku, deklaroi se mbi këtë fashë OSHEE do të faturojë çdo kilovat orë me 42 lekë më shumë. Kjo është një nga masat e planit të qeverisë Rama për të përballuar krizën energjitike. Por bizneset i druhen një vendimi për rritje çmimi që mund t`i prekë edhe ata.

Erida Bonjaku, drejtuesja e furrës së bukës i tha pozitivi.org se nëse do të kishte një rritje të çmimit të energjisë elektrike, kjo do të rëndonte direkt xhepat e qytetarëve, pasi do të reflektohej në rritje të mëtejshme të çmimit të bukës.

Eksperti i energjitikës Eduard Elezi i tha pozitivi.org se nga rritja e çmimit të energjisë elektrike do preken edhe bizneset.

Edhe në kushtet aktuale Shqipëria renditet në vendet që ka çmim të lartë të blerjes së bukës në raport me të ardhurat e familjeve shqiptare.

#furrebuke #oshee #belindaballuku #rama

© 2022, Pozitivi. All rights reserved.