Zjarri në Notre Dame: 9-vjeçarja britanike dhuron 3 € për rindërtimin e katedrales
Nuk janë vetëm të pasurit dhe të fuqishmit që po japin para për rindërtimin e Notre Dame pasi zjarri shkatërroi katedralen e Parisit këtë muaj. Një pjesë e vogël e gati 850 milionë eurove (947 milionë dollarë) të dhuruara deri më tani vijnë nga një burim shumë modest.
Një vajzë 9-vjeçare britanike dërgoi 3.38 € në Fondacionin du Patrimoine, një nga katër organizatat e ngarkuara nga qeveria franceze për mbledhjen e donacioneve për rindërtimin e katedrales.
“Të dashur qytetarë të Francës dhe Parisit, emri im është Caitlyn, unë jam 9 vjeç dhe jetoj në Angli”, shkroi Caitlyn Handley në një letër për fondacionin. “Kam dëgjuar për zjarrin e Notre Dame në radio dhe kam dashur të ndihmoj, e di që nuk është shumë, por çdo gjë ndihmon”.
Simon Handley, babai i Caitlyn, i tha CNN se vajza e tij ishte “shumë e mërzitur” pasi zbuloi se sa e vjetër ishte katedralja. “Ajo e ndjeu se mund të bënte diçka për këtë dhe tha se nuk mund të japë qindra apo mijëra, por do të japë aq sa mundet”, tha ai.
Handley e përshkroi vajzën e tij si një “vajzë me zemër të ndritshme”, e cila kujdeset shumë për të ndihmuar njerëzit dhe kafshët. Laurence Lévy, zëdhënëse e Fondacionit du Patrimoine, tha për CNN se organizata po merr mijëra dhurime në ditë.
“I gjithë ekipi ynë është mobilizuar dhe shumë vullnetarë kanë ardhur për të na ndihmuar, sepse ne nuk jemi mësuar të marrim një fluks të tillë donacionesh në një hapësirë kaq të shkurtër kohe, në punën tonë normale”, tha ajo. “Sigurisht, kur kjo krizë të ketë mbaruar, do të marrim kohë për t’iu përgjigjur mijëra donatorëve – 219,000 prej tyre”.
Caitlyn nuk ishte e vetmja që dërgoi para me postë: Një britanik dërgoi një zarf që përmbante gjashtë letra me vlerë 50 dollarë. Këto dy donacione britanike janë mes mijëra të tjerave. Fondacioni du Patrimoine tha në një deklaratë se kishte marrë 17,300 donacione prej 1.6 milionë eurosh në më shumë se 160 vende të huaja. Lévy i tha CNN-së se organizata ka mbledhur gjithsej 164 milionë euro që nga fillimi i fushatës së saj.
© 2019, Pozitivi. All rights reserved.
