Elona Gjebrea: Fuqizimi i edukimit ndihmon të minimizohen rreziqet e abuzimit tek fëmijët e adoleshentët
08/06/2020 Shpërndaje

Elona Gjebrea: Fuqizimi i edukimit ndihmon të minimizohen rreziqet e abuzimit tek fëmijët e adoleshentët

Elona Gjebrea, deputetja e Partisë Socialiste ka sot 7 propozime se si mund të forcohet sistemi arsimor në vend, me qëllim parandalimin e rasteve të ngjashme me atë të 15 vjeçares, ngjarje që shokoi jo pak opinionin publik. Deputetja socialiste thotë se edukimi seksual i të rinjve është i domosdoshëm sipas standardeve që njihen dhe në botë, sipas grupmoshave dhe metodologjive bashkëkohore. Por me shumë rëndësi për zonjën Gjebrea është edhe trajnimi i vazhdueshëm të mësuesve që të ofrojnë më të mirën dhe si duhet për tema që kanë qenë tabu e padyshim jo të lehta për tu trajtuar.

JoTabu.al
Ju kemi parë shumë të angazhuar dhe mund të themi edhe e shqetësuar mbi rastin e përdhunimit të vajzës 15 vjeçare në kryeqytet pak ditë më parë. Për këtë arsye zhvilluat një seancë dëgjimore në Komisionin Parlamentar e gjithashtu gjatë seancës plenare mbajtët një fjale kushtuar kësaj ngjarjeje të rëndë. Mund të na thoni si e keni parë rastin e përdhunimit të 15 vjeçares?

Elona Gjebrea, Deputete e PS-së:
“Padyshim jam prekur nga ngjarja me 15 vjeçaren dhe në fakt Aleanca e Grave Deputete zhvilloi javën e kaluar një dëgjesë publike me zv Ministret e Shëndetësisë dhe Çështjeve Sociale si dhe me atë të Brendshme për situatën e dhunës në familje gjatë situatës me Covid 19.
Por padyshim shqetësimi dhe i kolegeve të mia ishte rasti i 15 vjeçares. Një histori që na shtyn të mendojmë e reflektojmë, por edhe të gjejmë rrugën e duhur për të frenuar raste të tjera në të ardhmen. Jo me kot shqetësimin tim dhe të kolegeve e shpreha dhe gjatë fjalës time në Parlament ditën e enjte. Politika duhet ti japë më shumë mbështetje punës që bëhet në fushën e mbrojtjes së fëmijëve e të ndihmojë për të korrektuar problematikat e ndryshme që hasen dhe që në disa raste të agravuara krijojnë situata të pakëndshme e shqetësuese”.

JoTabu.al
Në fakt çfarë duhet të ndryshojë në të gjithë infrastrukturën dhe menaxhimin e sistemit arsimor në vend duke pasur parasysh rrezikun që mund të kenë fëmijët në ambientet e shkollës?

Elona Gjebrea, Deputete e PS-së:
“Në fakt përmenda gjatë fjalës time disa sugjerime për forcimin e sistemit:

  1. Parandalimi përmes edukimit
  2. Forcim të gjithë strukturave në shkolla
  3. Vlerësim i situatës së nxënësve në çdo shkollë në bashkëpunim me psikologët dhe bashkitë
  4. Fuqizim të bordit të prindërve dhe diskutime në formate të gjera për rolin e familjes në shoqëri
  5. Rishikim të rolit të oficerëve të sigurisë në shkolla
  6. Rivitalizim të mekanizmit të referimit
  7. Komunikime dhe trajnime me mediat”.

JoTabu.al
Ka ardhur momenti që edhe sistemi arsimor të përfshijë edhe me gjrwsisht edukatën seksuale në shkollat shqiptare?

Elona Gjebrea, Deputete e PS-së:
“Në dijeninë time kjo edukatë është e përfshirë në kurrikulat arsimore. Por gjithmonë ka mundësi për përmirësime e një vlerësim të çfarë ajo ofron e si është përfitimi ndihmon”.

JoTabu.al
Si mund të ndikonte edukimi seksual i fëmijëve në mbrojtjen e tyre, duke pasur parasysh edhe rastin e fundit në kryeqytet?

Elona Gjebrea, Deputete e PS-së:
“Edukimi seksual është i domosdoshëm sipas standardeve që njihen dhe në botë, sipas grupmoshave dhe metologjive bashkëkohore. Pa harruar trajnimin e vazhdueshëm të mësuesve që të ofrojnë më të mirën dhe si duhet për tema që kanë qenë tabu e padyshim jo të lehta për tu trajtuar”.

JoTabu.al
Mirëinformimi do të sillte më shumë mbrojtje për fëmijët dhe adoleshentët?

Elona Gjebrea, Deputete e PS-së:
“Sigurisht, edukimi siç duhet i fëmijëve dhe adoleshentëve është sfidë e vështirë e ku duhet të ndërthuren kontributet e prindit, mësuesve, individit e shoqërisë. Dikur edukimi familjar, por edhe shkollor, fetar dhe shoqëror, ishte për të gjithë i njëjtë, me rregulla të përbashkëta dhe të sigurta. Sot kërkohet më tepër edukim personal dhe ndërpersonal, sipas moshës, gjinisë, aftësive, nevojave, rrethanave dhe mundësive. Në këtë kontekst një fëmijë dhe adoleshent i infomuar për situata ku mund të cënohen të drejtat e tij e mund të bie pre e abuzimeve dhe dëmtimeve ndihmon për ti parandaluar ato. Gjithsesi jetojmë në një shoqëri demokratike por dhe të paragjykuar ku individi mund të shantazhohet e intimidohet ndaj fuqizimi i edukimit ndihmon të minimizohet rreziqe të tilla, e forcon individin dhe e përgatit atë në rrugëtimin e tij të gjatë të jetës”.

© 2020, Pozitivi. All rights reserved.