30/09/2022

SHKËLQIMI I BASTEVE ILEGALE ONLINE. RRËFIMI I “SEKSERIT” TË BASTEVE: SI BASHKËPUNOJMË ME POLICINË!

Propozimi për rihapjen e basteve online

Në një mënyrë të beftë, Komiteti Olimpik Kombëtar Shqiptar hodhi pak ditë më parë në tregun mediatik propozimin për rihapjen e basteve, por këtë here online. Një sërë drejtorësh të institucioneve që po luftojnë prej 4 vitesh këtë aktivitet ilegal, u rreshtuan në një konfernecë nga ku kërkuan hapjen e basteve online me ligj.

Për ndonjë syresh (AKEP), kjo duhej bërë se kishin të pamundur nga ana teknike të kontrollonin ilegalitetin, disa të tjerë e propoganduan këtë formë si mënyrën më të mirë për të vjelë të ardhura për investimet në sport. Propozimi duket se ka edhe bekimin e kryeministrit Edi Rama, që ishte edhe iniciatori i mbylljes së pikave fizike të basteve.

Fundi i marrëzisë që nuk mori kurrë fund!

Nga 1 janari i 2019 iu vu dryni çdo pike basti në Shqipëri. Sipas kryeministrit Edi Rama, ato ishin rrënuese të ekonomive familjare dhe po shkatërronin shumë çifte të reja. Po a kanë vërtet 4 vite shqiptarët që nuk luajnë në baste paratë e tyre? Pozitivi.org iu sjell rrëfimin e këtij personazhi, që luan rolin e ndërmjetësit mes atyre që luajnë dhe pronarit që ka llogarinë online.

Ai tregon se si humbasin paratë e tyre shqiptarët në një industri që është krijuar për të marrë e jo për të dhënë lekë. Skema është shumë e thjeshtë. Ajo ka 3 hallka; pronarin që xhiron paratë, ndërmjetësin që hyn në account pra në llogarinë online dhe lehtëson vënien e basteve si edhe lojtarin që hedh paratë. Në këto faqe bastesh online, ndërmjetësit hyjnë dhe luajnë paratë që u japin klientët. Ato kanë kategori të ndryshme, mes tyre edhe live scores, pra rezultatet live. Aty mund të shohësh në kohë reale nëse po fiton apo humbet paratë e tua.

Po shteti ku është?

E gjithë kjo veprimtari ilegale, zhvillohet jo vetëm me dijeninë e institucioneve që nuk duhet ta lejojnë, por në disa raste edhe me ndihmën e tyre. Për pozitivi.org Pëllumb Molla, drejtor i drejtorisë së krimit ekonomik në policinë e shtetit, deklaron se në total janë mbyllur 6.000 links që zhvillon këtë aktivitet të paligjshëm, por ato rihapen sërish. Policia i ka të identifikuara një pjesë të rasteve, por personat e përfshirë ndryshojnë domain dhe e rihapin sërish faqen.

Sipas rrëfimit të personazhit tonë që luan rolin e ndërmjetësit të basteve ilegale online, një pjesë e efektivëve të policisë janë bashkëpunëtorë të tyre.